نقده شهرینین محیط زیست قوروما ایداره‌سینین رئیسی بیلدیردی: “نقده شهرستانینداکی حسنلی بندیندن ‘سولدوز’ سولوق ساحه‌سینه بیر میلیون مترمکعب سو ئُوتورمه ایشلری باشلاندی.”
سید اکبر قایمی جومعه گونو ایرنا خبرچیسی ایله دانیشیقدا بونلاری دئدی: “نقده‌نین سولدوز سولوق ساحه‌سینین سولاندیریلماسی حسنلی بندینین سو کانالی یولو ایله باشلانیب و بیر میلیون مترمکعب سویون سولوق ساحه‌سینه داخیل اولماسی قرارا آلینیب.”
او، بو سولاندیرمانین یئنی سو ایلینین ایلک مرحله‌سی اولدوغونو بیلدیره‌رک خاطیرلاتدی: “حال حاضیردا سولدوز سولوق ساحه‌سی ۵ میلیون مترمکعب‌دان چوخ سویا صاحیبدیر و بو سولاندیرما ایله، کئچن فصلین تبخیر نتیجه‌سینده آزالمیش سویون چوخ حیصّه‌سی یئری دولاجاقدی.”
نقده محیط زیست قوروما ایداره‌سینین رئیسی آرتیردی: “سولدوز سولوق ساحه‌سینین یئنیدن جانلانماسی و تام سولاندیریلماسی، اورمیه گولونون جنوب کناریندا یئرلشمه‌سی نه‌دَنی‌ایله، گؤچمن و یئرلی قوشلارا، خوصوصیله بو فصلده، ائوصاحابلیق ائتمکده مۆهیم رول و نقش اوْینایا بیلر.”
او علاوه ائتدی: “بؤلگه‌ده مووسمی سولوق ساحه‌لرین قوروماسی نه‌دنی‌ایله، گؤچمن و یئرلی قوشلارین چوخو، پاییز کوچمه‌سینه حاضیرلاشماق اوچون سولدوز سولوق ساحه‌سینه داخیل اولورلار.”
فلامینگو و بوز دورنالار سولدوزا گلیرلر
قایمی دئدی: “نقده‌نین سولوق ساحه‌لری آراسیندا، سولدوز سولوق ساحه‌سی سو وضعیتی‌یه گؤره فلامینگولار اوچون مناسب یئردیر و هر ایل بو فصلده مین‌لرله گنج و یئتیشکین فلامینگولار بو سولوق ساحه‌یه داخیل اولور.”
او بیلدیردی: “بو ایداره‌نین متخصیصلری نظارتلری زامانی فلامینگولارا علاوه، سولدوز سولوق ساحه‌سینده ایلک گروه بُوز دورنالاری گُوروب و ایزله‌میشلر.”
نقده محیط زیست قوروما ایداره‌سینین رئیسی بونلاری علاوه ائتدی: “بوز دۇرنالاری هر ایل بو فصل ایستراحت و تغذیه مقصدی‌ایله، بو شهرستانین سولوق ساحه‌لرینه داخیل اولوب، بیر مودَّت قالدیقدان سونرا کُچمه‌لرینی داها جنوب منطقه‌لرینه داوام ائدیرلر.”
ایرنانین خبرینه گؤره، نقده‌ده‌کی سولدوز سولوق ساحه‌سی قُورونان منطقه اولاراق ساییلیر و اوندا هئچ بیر بالیقچیلیق و قوش اوْولاما فعالیتی‌ایله آیری حیوانلارین اوْولانماسی قاداغاندی و قایدا‌پوزانلارلا قارشی قانونا اویغون قارشیلانیر.
