آذربایجان-غربی استانی‌نین جهاد کشاورزی سازمانینین رئیسی بیلدیردی: “اوستانین ۲۲ مین هکتار محصول‌وئرن باغلاریندان اۆزوم توپلاما ایشلری باشلانیلدی.”
ایرنا خبرینه گؤره، محمدرضا اصغری سه‌شنبه گونو اورمیه اۆزوم باغلارینی بازدید ائدرکن خبر آژانس لار ایله دانیشیقدا بونلاری دئدی: “بو محصول اوچون تولید حجمی‌نین تخمینی۲۲۰ مین تُن‌دور و اورمیه شهرستانی بو محصولون اَکیم ساحه‌سی اعتیبارى‌ایله مملکتیمیزده بیرینجی رتبه‌یه صاحیبدیر.”
آذربایجان-غربی نین جهاد کشاورزی سازمانینین رئیسی داوام ائتدی: “بو اوستاندا تولید اولونان جمعی ۲۲۰ مین تون اۆزومون ۱۹۲ مین تُونو سووارما، قالانی ایسه دیم روشی ایله بِئجه‌ریلیر.”
او، بو اوستانین اۆزوم تولیدینده اؤلکه‌ده دؤردونجی رتبه‌یه صاحیب اولدوغونو بیلدیره‌رک دئدی: “ایللیک اوستاندا اۆچ صنعتی آبغورا واحیدی طرفیندن ۴۱۰ توندان چوخ اۆزوم، صنعتی شکیلده آبغورا تولیدی اوچون ایستیفاده اولونور.”
اصغری، آبغوره‌نین بؤیوک بیر حیصّه‌سینین اوستاندا سنتی روشلرله حاضیرلاندیغینی خاطیرلاتاراق توضیح وئردی: “آبغورا، ائو ایستیفاده‌لرینده، سالات حاضیرلاما و یئمکلره چاشنی اولاراق ایستیفاده اولونور.”
او، اوستاندا تولید اولان اۆزومون بیر حیصّه‌سینین ایللیک قُونشو اؤلکه‌لره صادر اولوندوغونا ایشاره ائده‌رک خاطیرلاتدی: “تولید اولونان محصولون ۶۰%-ی تازه اولاراق اوستاندا و اؤلکه‌نین دیگر بؤلگه‌لرینده ایستیفاده اولونور و بیر میقداری دا صادر اولونور. قالان محصول ایسه صنایع تبدیلی‌ده میوه‌شیراسی، کیشمیش و اۆزوم شیره‌سی شکیلینه سالینیر.”
