رئیس‌جمهور بین‌الخالق استاد شهریاری آنما کنگره‌سی‌نه گؤندردیگی پیامدا بیلدیردی: “شهریار، حیاتین شاعیری ایدی؛ شاعیرلیکله یاشایان و ئوره‌یین دیلی ایله اینسان، عشق، ایمان و وطندن دانیشان بیر شاعیر ایدی.”
ایرنادان وئریلن خبره گؤره، دکتر مسعود پزشکیان پیامیندا ایرانین شعر و دۆشونجه، عرفان و حماسه اؤلکه‌سی اولاراق، همیشه موختلیف دیللرین آلتیندا اینسانی و ایلاهی مدنیتین گؤرونوشو اولدوغونو قئید ائدهرک، بونلاری علاوه ائتمیشدیر: “بونلارین آراسیندا، استاد شهریار، حافظ دیوانیندان آلدیغی تخلوصلا، نه‌فقط فارسجا غزلین چیراغینی توزلو بیر دؤورده ایشیقلی و یانان ساخلامیش، بلکی تورکجه شعرلری‌ایله ده آذربایجان و بوتون ایران خالقینین جان و دۆنیاسینی سئوینجه بۇروموشدور.”
اؤلکه‌میزین رئیس‌جمهورو قئید ائتمیشدیر: “شهریار فارسجا غزله‌لری‌ایله یاناشی، ‘حیدربابایه سلام’ کیمی قالارجی منظومه‌سی و دیگر تورکجه شعرلری‌ایله، آنا دیلینی دونیا ادبیاتینین اوجونا چاتدیرمیش و شعرین سرحد تانیمادیغینی، و ئوره‌کدیرکی شعری یارادیر.”
او، شهریارین شعرلرینین، بوْتون رنگ‌لری، ذؤوقلری و لهجه‌لری‌ایله ایسلامی ایرانین آیناسی اولدوغونو بیلدیره‌رک دئمیشدیر: “شهریار، جمعیتین قلبینده یاشایان، خالقلا اولان، آغری و سئوینج‌لره قوْشانان بیر شاعیر ایدی و بونا گؤره سؤزلوگو دیللره یئرلشمیشدیر. آیینی شعرلرینده، ‘شب و علی’دن ‘مناجات’ا قدر ایمانین و ایخلاصین درینلیگینی گؤرمک اولار؛ عاشقانه شعرلرینده‌ایسه اینسان شورونو و شعورونودا بیرلیکده حیس ائتمک اولار.”
دکتر پزشکیان خاطیرلاتمیشدیر: “اونون موسیقی‌ایله تانیشلیغی، صنعت اهل‌لری‌ایله هم‌نشینلیگی و جمعیتین متنینده اولماسی، شعرینه ایکی قات یوموشاقلیق وئرمیشدیر. شهریار، رودکی و فردوسینین قالدیردیغی بیر بایراغین وارثی ایدی و نظامی، مولوی، سعدی و حافظین زیبرتلیک وئردیگی سؤزو قوروموشدور.”
او، شهریارین آنماسینین، بوتون ایرانلیلارین اورتاق میراسینین آنماسی اولدوغونو بیلدیره‌رک دئمیشدیر: “بو میراثدا اینسانا عشق، مدنیته حورمت و عالی اینسانی دَیرلره ایمان آخیشیدیر.
دکتر پزشکیان پیامینیندا علاوه ائتمیشدیر: “استاد شهریارین وفات گونونون ‘میلی شعر و ادب فارس گونو’ اولاراق آدلاندیریلماسی، ایراندا دیل و مدنیت آراسینداکی باغلانتی نین بیر سمبولدور؛ شهریار اؤز شعرلری‌ایله بو باغلانتی‌نی دَرینلشدیرمیش و گئنیشلندیرمیشدیر. او، فارسجا دیلینین بیرلیک و دۆشونجه دیلی، تورکجه‌نین‌ایسه هیس و باغلانتی دیلی اولدوغونو گؤسترمیش و هر ایکیشی شعرلرینده گوزللیکله یاناشی اوتموشدور.”
اؤلکه‌میزین باشقانی استاد شهریارین خاطیره‌سینی یاد ائدهرک و بو بین‌الخالق کونقرسین تشکیل‌ده‌چیلرینه مینتدارلیغینی بیلدیره‌رک دئمیشدیر: “اینانیرام کی، بو اؤلکه‌ده شعر و دۆشونجه چیراغی، ایمان، عشق، صولح و بیرگه‌یاشاماق پیامینی دۆنیایا یایماقدا داوام اده‌جک.”
او پیامینی “حیدربابا” منظومه‌سینین آشاغیداکی بند‌ایله بیتیرمیشدیر:
حیدربابا، سنین گؤیلون شاد اولسون
دونیا وارکن، آغزین دولو داد اولسون
سندن کئچن تانیش اولسون، یاد اولسون
دِئنَن منیم شاعیر اُؤغلوم، شهریار
بیر عُوموردور، غم اوستونه غم قالار
بین‌الخالق استاد شهریار آنما کنگره‌سی، میلّی شعر و ادب فارس گونو موناسیبت‌ایله چارشنبه و پنج‌شنبه گونلری (۲۶ و ۲۷ شهریور) شاعیرلر و دۆشونورلرین قاتیلیمی‌ایله تبریزده کئچیریلمیشدیر.
شهریارین وفات گونو اولان ۲۷ شهریور، عالی اینقیلاب شوراسی‌نین تصویبی‌ایله فارسی شعر و ادب گونو اولاراق آدلاندیریلمیشدیر.
