غربی آذربایجان استانداری دئدی : “استانین اینکیشافینین ایتیریلن حلقه‌سی، اوتوموبیل صنایعی‌دیر. استانین مرکزینده ایختصاصی خودرو شهرکینین قورولماسی، بیزیم اساسی برنامه‌لریمیزدَندیر.”
آذربایجان فردا خبر آژانسی‌نین صدا و سیما خبرگزاری‌سیندن آلدیغی خبره گوره؛ غربی آذربایجان استانداری، ایلده‌کی خودرو صنایعی‌نین سُون وضعیتی ایله باغلی کئچیریلمیش جلسه‌ده، استانین صنعتی جایگاهینین، یئنی‌دن تعریف ائدیلمه‌سی ضرورتی‌نین اوستونده دوراراق بیلدیردی: “استانین اینکیشافینین ایتیریلن حلقه‌سی، خودرو صنعتی‌دیر. چونکی، بوتون اینکیشاف ائتمیش اؤلکه‌لرده اوتوموبیل صنایعی، صنعتی دئییشیکلیک و ایش یئری یارادیلما‌سینین مرکزی اولموشدور.”
رضا رحمانی، غربی آذربایجان استانی‌نین اؤلکه‌نین داخیلی خامی حاصیلیندان اولان حقیقی حیصّه‌سینین، استانین تاریخی و جغرافی ظرفیتینه اویغون اولمادیغینی بیلدیره‌رک، علاوه ائتدی: “صنعت و سرحد توسعه‌سی بیزیم اولویت‌لریمیز اولموشدور، آنجاق چوخ سو ایستیفاده ائدن صنعتلری قبول ائتمه‌یه‌جاییق.”
او، اتومبیل ساحه‌سینده ایختصاصی زیرساخت‌لاری‌نین یارادیلماسی ضرورتی‌نین اوستونده دوراراق بیلدیردی: “غربی آذربایجاندا اوتوموبیل صنایعی اینکیشافینین اساسینی تریلی‌دوزلتمه و سونرا ایسه قطعه‌سازی تشکیل ائدیر و استانین مرکزینده ایختصاصی خودرو و قطعه‌سازی شهرکینین یارادیلماسی، بیزیم اساسی برنامه‌لری‌میزدندیر.”
غربی آذربایجان استانداری، مجوزلرین وئریلمه یوللاری آسانلاشدیریلماسی ضرورتی‌نین اوستونده ده دوراراق علاوه ائتدی: “مۆدیرلر آچیق فیکیرلرله توسعه یُولونو آچمالی‌دیرلار و چُوخلو سایی‌دا سرمایه‌قویانلار استانیمیزا گلمه‌یه حاضیردیرلار، بیز اونلارین الینی توتمالی‌ییق، اونلاری اومودسوز ائتمه‌مه‌لی‌ییک.”
رحمانی، تولید واحیدلری اۆچون تسهیلات و خاریجی پول تأمین ائدیلمه‌سینین جامع بیر بسته شکلینده ایزله‌نمه‌سی ضرورتو بیلدیره‌رک، علاوه ائتدی: “بیز استاندا اتومبیل فیکیر اوتاغی قوروجاغیق و نهایی مقصدیمیز، غربی آذربایجان استانی‌نین اؤلکه‌نین قطعه‌سازی مرکزینه چئوریلمه‌سیدیر.”
سون اولاراق، والی صنعتی دییشیکلیک اۆچون واختین محدود اولدوغونو و فرصتلری ایتیرمهمه لی اولدوغوموزو قئیض ائده رک، علاوه ائتدی: “اوتوموبیل ساناییسینین اینکیشافی بیزیم اۆچون اساس بیر سیاست اولوب، ایلین صنعتی کیملیک ورقینه چئوریلمه لیدیر.”
آذربایجان فردا خبر آژانسی‌نین خبرینه اساساً، استاندار بوندان اونجه بیلدیرمیشدی که، “بیزیم مقصدیمیز غربی آذربایجانی اؤلکه نین ایلک ۵ اقتصادی بؤلگه سیندن بیرینه چئویرمکدیر.” لاکین، بو مقصدین نه قدر تحقق تاپاجاغی، اونون و ۱۴-جۆ دولتین عمرو مدتینده آیری دولت آداملارینین عملکردیندن آسیلی اولان بیر مئسله دیر و بو مقصدین تحقق تاپماسی و استانین توسعه‌سینده نه قدر تاثیر گوسترمه‌سی‌نی زامان تعیین ائده جک.” / خبرین سونو
