غربی آذربایجان استانینین حوزه هنری طرفیندن وئریلدیغی خبره گؤره، بو استانین بویوک هنرمندی اُولان عاشیق دهقان ئُوز دونیاسینی دئیشدی.
داریوش علیزاده شنبه گونو ایرنا خبر آژانسیایله دانیشیقدا دئدی: بو بویوک و بئنزرسیز انسان و آشیقلار موسیقیسینده تایسیز یئری اولان هنرمندین توپراغا تاپشیرما مراسیمی، اورمیهنین باغ رضوانیندا کئچیریلدی و اونو سئونلرینین نیسگیلی و حسرتیایله بورونن اورتامدا توپراغا تاپشیریلدی.
علیزادهنین دئدیغینه گؤره عاشیق دهقان چوخلو یاشادیغی عزتله دولو گونلرینده چوخلو شاگیردلر تربیت ائتمیش که هر بیری بو بویوک استادین تعلیم سایهسینده آشیقلار موسیقیسینده دهیرلی یئر قازانیبلار و اونلاردان عبارت عاشیق بولود ساعد، عاشیق علی کریمی و آیری هنرمندلری سایماق اولار.
غربی آذربایجانین حوزه هنری ادارهسینین روابط عمومی مسئولو بونلاریدا آرتیردی کی: بیرینجی مستند فیلم، آشیق دهقانین بویوک توتما و گلن نسیللره تانیتما هدفیایله 1396 ایلینده بو اداره طرفیندن حاضیرلانیبدی.
آذربایجان فردا هفتهنامهسینین یازارلار هیئتی طرفیندن بو بویوک هنرمندین دونیادان کوچمهسینی بوتون سئونلرینه تسلیت دئییب و آللهدان رحمت و مغفرت دیلهییر.
