آنادیلینده تورکجه یازماق چون چئتین اولماسادا یازماغا چالیشمادیغیمیزا گُوره چوخ‌دا راحات ساییلابیلمز، مملکتیمیزین رسمی دیلینده اوخویوب اویرندیغیمیزین و یا دنیانین باشقا دیللرینی اویرنمه‌‌نین گوزللی‌یی هر نه قدر اولسادا آنا دیلینی اصولی‌جه اویرنمک و آنادیلیمیزده یازماغیمیزیندا اوقدر بلکه‌ده اوندان آرتیق و آیریجا گوزللیغی اولمالی‌دی؛ سیزلرده یقین‌کی بو سوزو سوسیال مدیادا یادا نه بیلیم بیر یئرلرده اوخویوب یادا بیریلریندن ائشیدیبسیزکی، باشقا بیر دیلی دانیشاندا لهجه‌سی اولان کَس داها آرتیق یئتَنَکلی‌دی نی‌یه کی او شخص باشقالاریندان بیر دیل داها آرتیق بیلیر.
بیر نئچه ایل بوندان قاباق آذربایجان‌فردا آدلی هفته‌لیک درگی‌سینین مجوزینی آلماغا چالیشدیغیمیز زامانلار، ایلک دفعه فرهنگ و ارشاد وزارتخاناسینین مطبوعات معاونتینین اینترنت‌ده‌کی وب‌سایتیندا مجوز ایسته‌مه صفحه‌سیندن ایسته‌دیغینیز نشریه‌نین هانسی دیللرده یایینلانماسینی قصد ائتدیغینیز سوالینا یئتیردیغیمده، چوخ سئوینمیشدیم چونکو اوردا آنادیلیمیزی‌ده سئچه‌بیله‌جه‌ییمی گوروب آنلادیم و آذربایجان‌فردا عنوانینی داشییان نشریه‌نی ایکی دیلده یعنی هم مملکتیمیزین رسمی فارسی دیلینده و هم‌ده ئوز آنادیلیمیزده تورکجه یازیب یاییلماسینی سئچدیم.
تأسف‌لرکی سوسیال مدیا یا اجتماعی شبکه‌لرین گون به گون گئنیشلنمه‌سی و بو طرفده‌ده یازیلی مدیالار یا رسانه‌لرین گُوزدن دوشمه‌سی؛ چوخلاری کیمی بیزیمده هفته‌لیک درگیمیزی، اساسی مالی مسأله‌لرله اوز اوزه قُویدو و بو سبب‌له آذربایجان‌فردا هفته‌لیک درگی‌سی چوخ چئتین‌لیک‌لرله گلیب بو گونه چاتدی، آذربایجان‌فردانین وب‌سایتینی یولا سالدیق و بو وسیله‌ایله داها آرتیق یارارلی و فایدالی اولاجاغینی دوشوندوک و او نیت‌ین و او دوشونجه‌نین ثمره‌سی ایندی سیزین گوزلرینیزین قاباغیندادیر.
آذربایجان‌فردا سایتینین تورکجه شعر، تورکجه حئکایه، تورکجه خبر و تورکجه مقاله بولوملرینی آچدیق و هر بیر بولومده سیزلرین ده‌یرلی شعرلرینیزی، حئکایه‌لرینیزی و مقاله‌لرینیزی گوندرمه‌یینیزی گوزله‌ییریک؛ تورکجه خبر بولومونده چالیشاجاییق‌کی سایت‌دا فارسی دیلینده یاییلان خبرلرین تورکجه‌سینی‌ده یازاق و یایاق و البته‌کی بو یولدا سیزلرین‌ده بیزلره یاردیم یا یولداش اولماغینیزا احتیاجیمیز وار.
تورکجه یازماق فیکیرلشدیغینیزدن‌ده راحات‌دیر یئترکی سیزده یازماغا چالیشین و کامپیوترین باشیندا اوتوروب بیر یئنی وُرد صفحه‌سی آچیب و عاغلینیزا گلنلری آنادیلیمیزده تورکجه یازین و بیزه گوندرین؛ ساغ قالین شاد یاشایین آلله‌ین آمانیندا
![مسمومیت دانش‌آموزان، ادامه سرکوب اعتراضات است [!]](https://azarbaijanfarda.ir/wp-content/uploads/2023/03/thumbs_b_c_0bd862ae5a8d0c4b88511793e6b36382-185x125.jpg)
